المشهد الذي حذفته الرقابة من مسلسل العائلة – لوحيد حامد 1994 : الديموقراطية اللى تقسم البلد نصين، عمرها ما تبقى ديموقراطية، تبقى فوضى .

30

المشهد الذي حذفته الرقابة “لم يتم عرضه” من مسلسل العائلة – لوحيد حامد 1994 (وحيد حامد.. العملاق كما خسرته الدراما المصرية).

مشهد (-)ليل/ داخلى المكان: مباحث أمن الدولة..

– تجلس مشيرة (ليلى علوى) أمام المحقق.. من الواضح أنه شخصية كبيرة وهامة فى هذا الجهاز..- تبدو متعبة ولكنها متماسكة- يتأملها المحقق .

المحقق: أسألك.. ولا تحبى تتكلمى من نفسك..

مشيرة: أتكلم أقول إيه .. أنا كل حاجة عندى قلتها فى تحقيق قبل كده..

المحقق: يمكن يكون عندك معلومات إضافية.. ويمكن تكونى ناسية حاجة!!

مشيرة: أفتكر إنى استوفيت كل حاجة..

المحقق: عاوز أسألك.. أنتى دخلتى الجماعة بإرادتك.. ولا تحت ضغط معين؟!

مشيرة: دخلت الجماعة بإرداتى..

المحقق: ليه؟!

مشيرة: كانت حواليا ظروف.. كنت عاوزة أهرب من حياتى.. كنت عاوزة أشوف ناس تانية غير اللى كنت عايشة وسطهم..

المحقق: أثناء وجودك فى الجماعة, كنتى مبسوطة؟!

مشيرة: لأ.. علشان كده هربت.. دول كانوا عاوزين يقتلونى أنا ومصباح علشان هربنا..

المحقق: طيب.. واحدة مثقفة زيك مش غريب عليها إنها تعيش المدة الطويلة دى كلها داخل الجماعة وهى مش مقتنعة!

مشيرة: أنا زيى زى كل الناس.. وكانت فيه حواليا حاجات كتير مأثرة عليا.. وكان من الصعب إنى آخد قرار.. كنت مقسومة نصين..!! مش عارفة هم صح ولا غلط..

المحقق: ممكن تشرحى لنا الظروف اللى أثرت عليكى.._

تتنهد فى عُمق.. تنظر إليه فى تحفز.

مشيرة: حضرتك عارف إن فيه دعاة فى بعض الجوامع بينادوا بالدعوة بتاعتهم وعلنا..

المحقق: ده صحيح..

مشيرة: وحضرتك عارف إن فيه مدرسين بيستلموا الأطفال من حضانة لثانوى يشربوهم التعصب والتشدد..

المحقق: ده صحيح..

مشيرة: وحضرتك عارف إن فيه أساتذة جامعة بتكفر العلم فى قلب المدرجات, وعلى الطلبة السمع والطاعة, يا كده يا يسقطوا آخر السنة..

المحقق: ده صحيح..

مشيرة: وحضرتك عارف إن فيه مقالات بتتكتب فى الجرايد القومية وغير القومية كلها تأييد ومناصرة للعنف..

المحقق: ده صحيح..

مشيرة: ومطابع مالهاش عدد عمالة ترص فى كلام لما بقى عندنا أكبر سوق للكلام فى العالم كله..

المحقق: ده صحيح

مشيرة: وتقريبا مفيش جهاز أو مصلحة مهمة, إلا ما بقى فيها مندوب..

المحقق: ده صحيح..

مشيرة: حضرتك عمال تقول ده صحيح.. ده صحيح, ممكن حضرتك تقول لى إيه هو اللى مش صحيح لما انتو شايفين ده كله, ومبسوطين بالفرجة وبس..

المحقق: اوعى تنسى إننا فى بلد ديموقراطى..

مشيرة: الديموقراطية اللى تقسم البلد نصين, عمرها ما تبقى ديموقراطية, تبقى فوضى.. وبالطريقة دى, وطول الحال ما هو كده.. لو قبضت على إرهابى تانى يوم هتلاقى بدل منه اتنين.. ولو قبضت على عشرة.. تانى يوم هتلاقى عشرين.. انتهت أقوالى..

مشهد يوفر ربع قرن من العبث روز اليوسف عدد الاثنين 21 مارس 1994م

80%
Awesome
  • Design

Leave A Reply