fbpx

رسالة تحذيرية هامة من تونسية في إيطاليا أصيبت بكورونا

270

مرضت وطحت فرد طيحة وعشت في عالم اخر نفيق منو ساعة ساعة تقول كنت نحلم ولا في غيبوبة ووصلت للمواصل متاع سايي متعدية في الطويل ورجعت وفيقتني دوزة دوا قوية ورجعت طحت وجنابي طابو مالفرش وتنفست بالدبوزة والماكينات وتنقبت بالزرارق وعشت الشك وعشت التاكيد وصار فيا العجب ومستحيل كان ركبني الستراس الي ركبني وانا نرا في استهتار التوانسة … كي كانت تسيبني السخانة وبدني يصحصح يكلموني اصحابي ويلقاوني باللي نقدر نتكلم ونحكي ونفدلك وماطحتش للستراس والخوف .. اما الي نرا فيه توة مخليني العصب يهز فيا وينفض ..يا بشر ياناس يا عباد راهو لا ينفع فيها اغسلب يديك لا جال لا بافات لا حتى شي من هذا الكل … يلزم تشدو دياركم يلزم توقفوا نشاطاتكم الاجتماعية المبنية هالنفاق والفم يبوس والقلب ماكلو السوس لمدة جمعتين الناس الكل مع بعضكم فرد وقت ..موش جماعة شادة الدار وجماعة تدور هكاك المرض ما يتحصرش .. راهي الدول الي فرضت الحجر الصحي وسكرت البلاد ماهيش تفدلك راي الدول الي ضحات باقتصادها وبمليارات المليارات ماهيش تفدلك ..راي ايطاليا جربت الحلول الكل … لبسو الماسكات وغسلو يديهم وسكرو القهاوي العشية برك الخ وشي وصلو للحجر العام … راهي تونس تستنى في اللطخة راو اليوم اي واحد فيكم ينجم يكون مريض ويدور ويعدي في الناس وموش فايق … موش بالضرورة تكون مروح من برة وموش بالضرورة تكون سلمت عل حد من برة باش تحط روحك في الحجر … راو دائرة تفشي المرض اكبر ببرشة من العلاقات المباشرة .. في الللحظة هذي باللوجيك وبالتجارب السابقة تونس فيها مئات المرضى الي يدورو وموش فايقين برواحهم لانو المرض مازال ماخرجش اعراضو … راهو فيروس خبيث يركش لداخل ويضرب ضربة وحدة مايخليش فرصة للعبد يفهم روحو البدن يتهز ويتنفض .. ياعباد راهو يقطع النفس فعليا ويوصلك تهتري بالسخانة وتشوف في خيالات … راو عبد كبير مايمنعش … يا عباد شدوا دياركم واخرجوا كان للضرورة القصوى ووقتلي تضطروا للخروج وقتها نظفوا وعقموا … اليوم ماكمش احرار ..تونس عندي فيها ناس عزاز وقراب واحباب واصحاب نخاف عليهم .. انا حكيت لين عييت اما زايد نوعي فلي نعرفهم وانتم تدورو وتحوصوا و يخرج عبد نعرفوا لضرورة شريان ماكلة ولا دوا تعرضو سيادتك تمرضو يموت … يا اخي كي ماكمش اصحاب وعي حضاري كونو اصحاب مسؤولية اخلاقية ..راهو عبارة قتل عمد مادام تعرف لكن تستهتر .. كونو اصحاب وعي ديني راهو حرام تعرف انو فمة وباء عالمي وانت عامل وذن عروسة … بجاه اللي خلقكم الي تعبدوه الي يعز عليكم شدو دياركم … راهو مسألة ايامات وباش يبدا الطايح اكثر مالمرفوع وسبيطاراتنا ماعندهاش بلايص وماعندهاش امكانيات ..تلك حدود الله… ميسالش في عوض تخرجو تشدو التلفون في القهوة ولا في راس النهج اقعدو في الديار وشدو تلفوناتكم في الفرش … راو ايطاليا فاتت العشرين الف ومازالت تزيد موش من قلة الماسكات والتنظيف اما خاطر العباد قعدت تخرج وتخدم وتمشي وتجي .. مافماش حل اخر غير الحجر … اشريو ماكلتكم وشدو دياركم … ياحليلي تعبت راني خايفة عالناس الي نحبهم منكم .

80%
Awesome
  • Design

Leave A Reply